BB7個月大睇乜書書好? (一)

文章日期：07/18/2013 01:02 pm

雖然湊孖B係需要好好follow時間表, 不過每日玩乜就真係唔需要太routine. 今日食完午餐(BB食完, 大人又食完), BBs 就去自己睇書書 (我地當然會係旁邊睇住, 講解下), 不過佢地有時都鍾意自己睇同"玩"本書.

話說營孖媽我對BB書真係"零"知識, 但係BBs又真係需要睇書學習架喎, 咁我當然非常積極去做資料搜集啦! 大大小小嘅書確實買咗好幾本, 不過佢地暫時最鍾意嘅都係下圖嗰本. 同一系列買咗兩本, 另外嗰本佢地都鍾意, 不過哩本係非常鍾意!!! 由佢地6個月大開始俾佢地睇, 到而家都未厭. 大孖仲會因為哩本書係目標而爬得好快, 哈哈!

同其他書比較, 佢地特別鍾意哩本,我諗係因為:

1) 哩本有D毛毛突出(如圖下)
2) 大小適中 (用手仔楂住)
3) 圖畫簡單, 易明
4) 顏色鮮艷
5) 我 /佢地婆婆會加插動物叫聲~


星期六去書展, 希望可以搵倒多D哩類書書啦!

BB 飲食時間表 (7個月)

文章日期：07/16/2013 11:58 pm

BBs7個月同6個月嘅時間表基本上差唔多, 只係

1. 午晚餐早咗食
2. 加左肉肉
3. 午餐D奶唔係飲, 而係撈落糊仔度食
4. 晚餐轉食粥仔
5. 夜晚早咗瞓覺覺豬

而且(1) & (5) 係BBs自己主導 (佢地早咗喊, 表示想食/瞓)!

有時BBs有奶癮, 我地會同佢地玩, 分散注意力, 但有時太勁(典下典下), 我地都會俾1安奶/水佢滿足下 (大孖同細孖一星期都有1-2次).

詳情可以睇番: BB 飲食時間表 (6個月)
http://www.hk-dietitianmama.blogspot.hk/2013/07/bb-6.html

7個月大餐單
http://www.hk-dietitianmama.blogspot.hk/2013/08/bb7.html

	7個月大: 每天飲食時間表
	7:00 AM	起身, 坐 potty wee wee
	7:15 AM	5 安奶
	7:45 - 9:00 AM	玩
	9:00 - 10:00 AM	小睡1小時
	10:00 - 10:45 AM	玩
(午餐)	10:45 AM	3 安奶 (用來開米糊)	+ 米糊 + 蔬菜 + 肉
	11:30 AM	食完午餐, 坐 potty poo poo
	11:30 - 1:45 PM	玩
	1:45 - 2:30 PM	沖涼	(兩個輪住)
	2:30 PM	5 安奶
	3:00 - 4:00 PM	飲完奶, 小睡1小時
(小吃)	4:00 PM	水果
	4:20 - 6:00 PM	玩
(晚餐)	6:00 PM	粥	+ 蔬菜 + 肉
	6:30-8:45 PM	玩
	8:45 PM	5 安奶
	9:15 PM	瞓覺 (一覺瞓天光)

BB第一次食蜜糖豆, 黃花魚

文章日期：07/15/2013 09:42 am

雖然BB開始咗食固體食物已經有1個半月, 不過到而家都仲未食過晒營孖媽我為BBs諗好嘅蔬菜, 魚魚同水果呢! 因為實在太多種類可以選擇喇!

今日就食我最鍾意食嘅黃花魚啦! 哈哈, BB食魚背, BBs婆婆同我食魚腩. 我嘅原則係我食嘅嘢, 大部份BBs都可以食, 而我唔係咁鍾意食嘅嘢, 更加要俾BB食, 等佢地習慣食唔同味道嘅食物! ** 當然可能會致敏, 比較難消化嘅就排得後D啦!

大魚腩 vs 黃花魚 , 大魚腩居然勝出!!! BBs Mami 我最鍾意食黃花魚 (可能係因為我祖籍係上海人, 所以食慣咗), 但就唔係咁識欣賞大魚 (因為覺得腥D), 估唔到BBs鍾意大魚多D呢! 不過客觀D, 試過BBs食嘅大魚腩同黃花魚 (清蒸, 無加薑蔥, 無調味), 又真係大魚腩香D同滑D!

而蜜糖豆都好得BBs嘅歡心! 清清甜甜.

** 魚蓉要整得蓉D, 如果唔係BB可能會唔鍾意 (如果好似我地BBs咁未有牙).

BB食蓮子 (健脾安神)~

文章日期：07/09/2013 10:00 am

今日BBs婆婆去開街市, 見到罕有嘅新鮮蓮子, 所以就買咗俾BBs試! 營孖媽我雖然係營養師, 不過都好支持中醫嘅養生同埋老人家嘅傳統智慧(部份), 所以我都會俾BB試食蓮子, 淮生, 百合, .......等等嘅"養生保健"食物 (中醫角度). **只限平時大人用來煮餸嘅材料.  
不過用新鮮蓮子會比較花時間. 首先將蓮子烚一烚, 趁熱嘅時候去衣同芯, 然後再烚至霖, 然後就又係用攪拌機(要加少少烚蓮子水)攪至蓉狀. 味道果然非常好啊!!! BBs好鍾意食呢! 不過鮮蓮子唔係成日有得買, 所以下次會試下用乾蓮子.

 

BB第一次食魚魚~

文章日期：07/07/2013 10:15 am

試完雞2日之後, BB就試下魚魚喇! 估唔到BBs咁鍾意食呢!!! 實在太好喇! 青瓜蓉清甜, BBs又都好鍾意食呢!

而且哩兩樣都係超容易整! 大魚腩蒸完只需抽出骨, 然後用筷子/叉/匙略壓碎, 唔使用攪拌機. 青瓜切粒蒸熟用攪拌機攪成蓉狀.

初初有試過一次過整晒D魚蓉, 然後分一份份放入冰箱, 但係諗諗下, 都係將鮮魚先分成一份份(生的), 放入冰箱, 食嘅時候先攞出嚟蒸, 因為我只有一個冰箱, 又放生食物, 又放熟食物, 會容易有交叉感染嘅機會. 而且每日蒸都唔係好麻煩.

BB食肉喇 (第一種肉食邊種好呢?)!

文章日期：07/05/2013 10:12 am

食咗三日蛋黃, 係時候俾BB試下肉嘅滋味喇! 咁又食邊種先好呢? 豬, 魚, 雞, 牛? 其實無乜所謂, 而佢地姨婆婆咁啱買咗隻嘉美雞上黎 (俾大人食嘅, 不過可以切D肉俾BBs), 所以就先食雞啦!

第一日整嘅雞蓉 (圖下) - 失敗!!! 因為太粗喇! BBs居然食到打咗幾個冷震! 我自己試過味, 又真係幾難哽.....難為了BBs.....

第二日有見及此, 一於試下加D蒸雞汁 & 水一齊落攪拌機 (水/汁剛剛蓋過D雞). 真係得喎! D雞蓉滑咗好多 (圖上), BBs都無咁抗拒 (不過都係鍾意糊 /粥 /蔬菜水果多D)~ 所以就糊 /粥 + 雞蓉一啖, BBs嘅接受度都高D.

BB第一次食蛋蛋

文章日期：07/03/2013 10:00 am

究竟幾時先開始俾BB食蛋呢? 其實到目前為止, 都無證據顯示延遲俾BB食蛋可以預防食物敏感, 所以營孖媽我到BBs7個月大就俾佢哋先食蛋黃, 以增加佢地鐡質嘅吸收.

而一向崇尚自然同有機食品嘅我 (亦因為食品安全理由), 當然選擇嘉美雞雞蛋 /日本 /泰國雞蛋啦!

好在居企附近有一田(暫時發掘到有比較齊全嘅有機蔬菜), 所以買菜都方便. 而日本蛋又確實好香(可能係心理作用). 

今日就食椰菜雞蛋糊啦~