BB第一次食蜜糖豆, 黃花魚

文章日期：07/15/2013 09:42 am

雖然BB開始咗食固體食物已經有1個半月, 不過到而家都仲未食過晒營孖媽我為BBs諗好嘅蔬菜, 魚魚同水果呢! 因為實在太多種類可以選擇喇!

今日就食我最鍾意食嘅黃花魚啦! 哈哈, BB食魚背, BBs婆婆同我食魚腩. 我嘅原則係我食嘅嘢, 大部份BBs都可以食, 而我唔係咁鍾意食嘅嘢, 更加要俾BB食, 等佢地習慣食唔同味道嘅食物! ** 當然可能會致敏, 比較難消化嘅就排得後D啦!

大魚腩 vs 黃花魚 , 大魚腩居然勝出!!! BBs Mami 我最鍾意食黃花魚 (可能係因為我祖籍係上海人, 所以食慣咗), 但就唔係咁識欣賞大魚 (因為覺得腥D), 估唔到BBs鍾意大魚多D呢! 不過客觀D, 試過BBs食嘅大魚腩同黃花魚 (清蒸, 無加薑蔥, 無調味), 又真係大魚腩香D同滑D!

而蜜糖豆都好得BBs嘅歡心! 清清甜甜.

** 魚蓉要整得蓉D, 如果唔係BB可能會唔鍾意 (如果好似我地BBs咁未有牙).

BB食蓮子 (健脾安神)~

文章日期：07/09/2013 10:00 am

今日BBs婆婆去開街市, 見到罕有嘅新鮮蓮子, 所以就買咗俾BBs試! 營孖媽我雖然係營養師, 不過都好支持中醫嘅養生同埋老人家嘅傳統智慧(部份), 所以我都會俾BB試食蓮子, 淮生, 百合, .......等等嘅"養生保健"食物 (中醫角度). **只限平時大人用來煮餸嘅材料.  
不過用新鮮蓮子會比較花時間. 首先將蓮子烚一烚, 趁熱嘅時候去衣同芯, 然後再烚至霖, 然後就又係用攪拌機(要加少少烚蓮子水)攪至蓉狀. 味道果然非常好啊!!! BBs好鍾意食呢! 不過鮮蓮子唔係成日有得買, 所以下次會試下用乾蓮子.

 

BB第一次食魚魚~

文章日期：07/07/2013 10:15 am

試完雞2日之後, BB就試下魚魚喇! 估唔到BBs咁鍾意食呢!!! 實在太好喇! 青瓜蓉清甜, BBs又都好鍾意食呢!

而且哩兩樣都係超容易整! 大魚腩蒸完只需抽出骨, 然後用筷子/叉/匙略壓碎, 唔使用攪拌機. 青瓜切粒蒸熟用攪拌機攪成蓉狀.

初初有試過一次過整晒D魚蓉, 然後分一份份放入冰箱, 但係諗諗下, 都係將鮮魚先分成一份份(生的), 放入冰箱, 食嘅時候先攞出嚟蒸, 因為我只有一個冰箱, 又放生食物, 又放熟食物, 會容易有交叉感染嘅機會. 而且每日蒸都唔係好麻煩.

BB食肉喇 (第一種肉食邊種好呢?)!

文章日期：07/05/2013 10:12 am

食咗三日蛋黃, 係時候俾BB試下肉嘅滋味喇! 咁又食邊種先好呢? 豬, 魚, 雞, 牛? 其實無乜所謂, 而佢地姨婆婆咁啱買咗隻嘉美雞上黎 (俾大人食嘅, 不過可以切D肉俾BBs), 所以就先食雞啦!

第一日整嘅雞蓉 (圖下) - 失敗!!! 因為太粗喇! BBs居然食到打咗幾個冷震! 我自己試過味, 又真係幾難哽.....難為了BBs.....

第二日有見及此, 一於試下加D蒸雞汁 & 水一齊落攪拌機 (水/汁剛剛蓋過D雞). 真係得喎! D雞蓉滑咗好多 (圖上), BBs都無咁抗拒 (不過都係鍾意糊 /粥 /蔬菜水果多D)~ 所以就糊 /粥 + 雞蓉一啖, BBs嘅接受度都高D.

BB第一次食蛋蛋

文章日期：07/03/2013 10:00 am

究竟幾時先開始俾BB食蛋呢? 其實到目前為止, 都無證據顯示延遲俾BB食蛋可以預防食物敏感, 所以營孖媽我到BBs7個月大就俾佢哋先食蛋黃, 以增加佢地鐡質嘅吸收.

而一向崇尚自然同有機食品嘅我 (亦因為食品安全理由), 當然選擇嘉美雞雞蛋 /日本 /泰國雞蛋啦!

好在居企附近有一田(暫時發掘到有比較齊全嘅有機蔬菜), 所以買菜都方便. 而日本蛋又確實好香(可能係心理作用). 

今日就食椰菜雞蛋糊啦~

BB 食多D糊仔定多D粥仔好?

文章日期：07/02/2013 10:51 pm

BBs 7個月大喇! 都係時候review一下佢哋嘅餐單。營孖媽我一開始俾BBs食糊仔而唔選擇粥仔係因為BBs係媽媽肚肚內儲存嘅鐡質+奶奶入面嘅鐡質可以足夠BBs用到4-6個月大, 但鐡質需要會由6個月大開始增加至11mg (根據美國食品及藥物管理局 US FDA)! 而粥仔本身無乜鐡質, BBs一開始又食得少，所以都係有添加鐡質嘅糊仔好D。但當BBs 7個月大，每餐又可以食成大半碗糊仔，每日仲食足兩餐固體食物，咁究竟鐡質又會唔會太多呢?

 

BBs需要:    10mg / day

奶((我哋食開嘅牌子)提供    :    4.9 mg

糊仔(我哋食開嘅牌子)提供  :    一餐6湯匙 = 68% daily value = 10.2 mg

雖然添加嘅鐡質唔會100%吸收到，但係一日一餐糊仔 (我哋食開嘅牌子) + 奶真係夠晒鐡質，另一餐固體一於轉食粥仔!
註: 一開始試我地會整到D粥綿D (好似圖右咁), 過1-2日已經可以俾BBs食普通有粒粒嘅(好似圖左咁)~

 

*** 究竟咩係daily value? 可以睇番「BB食物營養標籤」

BB 食蕉蕉 & 番薯 (原隻上)!

文章日期：07/01/2013 11:53 pm

其實BBs由開始食糊仔起就已經好想自己楂住嘢食, 不過驚佢地哽親, 所以唔敢俾D未磨蓉嘅嘢佢地食. 係6月嘅某一日, 婆婆突然心血來潮, 俾大孖試下脷下香蕉, 脷咗幾下, 大孖就已經一大啖咁咬落去! 仲覺得好新奇! 不過應該真係未係好ready, 所以都差D哽親! 嚇到我!

由於香蕉比較軟, 可能一楂就一pat, 所以第一樣揀俾BBs自己攞住食嘅係~~~番薯 (7個月大先試)!!! 雖然容易楂住, 不過真係偏硬, 仲容易哽親! 細孖食嘢通常細細啖, 所以無乜問題, 不過大孖比較胃食, 所以大啖D, 比較容易哽親, 無專人看住, 真係唔好亂試啊!!